Dhirubahen Patelna Nibandh Nibandho
Dhirubahen Patelna Nibandh Nibandho | ધીરુબેન પટેલના નિબંધ નિબંધો | Gujarati Nibandh Mala | Gujarati eassy by Dhiruben Patelપ્રસ્તાવના ક્યાંય પહોંચવાનું જરૂરી ન હોય છતાં મનની મોજે લટાર મારવા નીકળી પડીએ છીએ ત્યારે દરેક પળ કંઈક જુદી જ અનુભૂતિ કરાવતી હોય છે. રાજમાર્ગે ચાલતા હોઈએ ત્યાં કોઈ રમણીય કેડી પર નજર પડે ને પગ એ બાજુ વળી જાય તોયે કોઈ કાન પકડનાર નહીં! એવું યે બને કે દિશા પકડવામાં ભૂલ થઈ હતી એવી ખબર પડે; તોયે શો વાંધો? વળો પાછા! રાજમાર્ગ તો રાહ જુએ જ છે ને? આ નિબંધોના જન્માક્ષર કાઢવા બેસીએ તો ઘણાં વરસોનો પ્રલંબ પટ દેખાય. કો નિબંધ ક્યારે લખાયો હતો તે યાદ આવે કે ન પણ આવે - પરંતુ એક વાત નક્કી, આ પુસ્તક અને આના જેવાં જ બીજા બે-ચાર પુસ્તકો ક્યારનાંયે તમારી પાસે આવી શક્યાં હોત પણ નથી આવ્યાં એ હકીકત છે. એમાં ગુનેગાર કોણ એની પંચાત શા માટે કરીએ” આ નિબંધો લખતી વેળાએ જે મનની મોકળાશ અનુભવી હતી તે જાણે આખા અઠવાડિયાની દુનિયાદારી પછી મળેલી રવિવારની લહેર! બધા રવિવાર આનંદદાયક ન પણ નીવડે, તેથી શું થઈ ગયું? સાહિત્યિક રચનાઓના નિશ્ચિત ચોકઠામાંથી થોડો વખત છટકી જઈને જે ફાવે તે લખવાની અને જેને ગમે તેને વાંચવા દેવાની મઝા પણ કંઈ ઓર જ છે ને! કોઈનોય આભાર નથી માનવો-માનવા બેસું તો આખી દુનિયાનો માનવો પડે! |
